Mondariz

Máis de 246.000 euros da Deputación para o saneamento de Mouriscados e Vilasobroso

A presidenta da Deputación de Pontevedra, Carmela Silva, informou da aprobación pola Xunta de Goberno de dous investimentos para Mondariz con cargo á liña 1 do Plan Concellos 2019 por un valor total de 246.133,93 euros. En concreto, son 88.415,11 euros para financiar a depuradora e saneamento no núcleo de Poñe (Mouriscados) e outros 157.718,82 euros tamén para depuradora e saneamento dos barrios de A Pena e O Cruceiro (Vilasobroso).

Nova presentación literaria na «Sección de Igualdade» da Biblioteca de Mondariz

O sábado día 16 de febreiro, ás 19 horas, a Biblioteca Pública Municipal «Xoán Xosé Pérez Labaca» de Mondariz, acollerá a presentación de tres libros dentro das actividades programadas polo Concello con motivo da apertura da «Sección de Igualdade», no centro bibliotecario. Desta volta serán tres as obras que se presentarán, todas incluídas dentro da ‘Colección Feminismo’ de Editorial Galaxia: Chámame señora, pero trátame coma a un señor de Inma López Silva; Feminicidio de Carme Adán e Ám@me de Cris Oliveira e Amada Traba.

Mondariz adquire novo equipamento para a Escola de Música e o Pavillón Municipal

O Concello de Mondariz investiu, con cargo á liña 1 do Plan Concellos 2018, un total de 6.624,57 € en adquirir material para a Escola Municipal de Música e o Pavillón Municipal de Deportes. En ámbolos dous casos, o material proposto permite unha optimización das dúas instalacións, tanto no que fai referencia ao seu aproveitamento por parte de usuarios e usuarias, no caso da Escola de Música, coma na posta en valor da propia instalación, no caso do Pavillón de Deportes.

Mondariz reforza o equipamento do Servizo de Axuda no Fogar

O Concello de Mondariz vén de dar conta do investimento de 2.130,01 € na adquisición de tres grúas para traballar as mobilizacións de usuarios e usuarias do servizo de Axuda no Fogar, investimento que realizarase ao abeiro da liña 1 do Plan Concellos da Deputación de Pontevedra.

Na memoria explicativa sinálase a mellora e evolución do servizo prestado e tamén de auxiliares do SAF, dende a implantación do programa SAF-Dependencia.
O certo é que o persoal que presta o servizo, asegura o alcalde de Mondariz, Xoán Carlos Montes, “atópase co problema, grave, do esforzo físico que supón para as auxiliares a mobilización e os traslados cama-cadeira de rodas ou cama-sillóns”.
A compra destas grúas realizouse co obxectivo de evitar lesións no ámbito laboral por sobre esforzos xa que o traballo de axuda a domicilio require de mobilizacións que se realizan a diario por tratarse de grandes dependentes.
Ao abeiro do Plan Concellos do pasado ano, o Goberno local de Mondariz solicitou a compra de 3 grúas para evitar, na medida do posible, ese esforzo pero, subliña Xoán Carlos Montes, “o número de usuarios e usuarias que o SAF atende, deixa claro que esas tres grúas son insuficientes”.
Agora, de cara a mellorar o apoio no domicilio para estas persoas con mobilidade moi reducida, o Concello de Mondariz solicitou o ano pasado outras tres grúas xa que “a meirande parte dos usuarios e usuarias son de renda baixa, pensións mínimas da seguridade social e non poden asumir estes gastos” conclúe o alcalde de Mondariz.

Mondariz acolle a proxección de 'Galegos en Lisboa. A historia xamais contada'

O vindeiro domingo, 10 de febreiro, ás 19 h, a Biblioteca Municipal de Mondariz acollerá a proxección do documental 'Galegos en Lisboa. A historia xamais contada', do director, produtor e guionista Xan Leira (Buenos Aires, 1955). A actividade, organizada pola Asociación Ecocultural Búrbida de Mondariz, conta co apoio do Concello e da Deputación de Pontevedra.

Carlos López Font visita as obras de mellora do campo da Lagoa en Mondariz

O deputado provincial de Cooperación, Carlos López Font, xunto ao alcalde de Mondariz, Xoán Carlos Montes Bugarín, visitaron hoxe as obras para a dotación de novas infraestruturas nos campos municipais de fútbol da Lagoa. É un proxecto incluído no Plan de Reequilibrio da Deputación, cun orzamento de 529.962,41 €, que son financiados integramente pola institución provincial. Un total de 423.969,92 € achégaos a Deputación a través deste plan provincial e os 105.992,49 restantes, con cargo ao municipio, proveñen do Plan Concellos 2018 e 2019.

Suscribirse a este canal RSS