Arbo xa ten cartel anunciador para a LIX Festa da Lamprea

Máis dunha vintena foron as propostas que, dende distintas zonas da xeografía española, chegaron ao Concello de Arbo para participar no concurso de carteis que cada ano escolle ao cartel anunciador da Festa da Lamprea, que este ano se celebrará os días 26, 27 e 28 de abril a súa quincuaxésimo novena edición.

Os debuxos foron entregados en soporte físico (papel, tea, cartón...) nun tamaño mínimo A3, así como en soporte dixital a máxima resolución. Cada participante podía presentar como máximo dous carteis. Os carteis presentados debían incluír de maneira correcta as datas da festa, as letras e a edición da festa, correspondentes ao ano 2019. Os materiais empregados, ao ser de libre elección, van desde lapis de cores, ceras, ou acuarelas ata témperas ou mesmo en colaxe.

festa lamprea cartel 2019 arboO alcance e repercusión que a festa da lamprea está a ter en España, afirma o Concello de Arbo, "demóstrase na alta participación no concurso de carteis da festa da lamprea. Con propostas chegadas desde Barcelona, Asturias, Almeria, entre outros lugares da xeografia española queda reflectida a intensa estratexia de promoción e difusión desta festa por parte do Concello".

O alcalde de Arbo, Horacio Gil, amosou a súa satisfacción "co alcance, a categoría e a participación" lograda nesta edición do concurso de carteis da «LIX Festa dá Lamprea», onde, sinalou, "os autores amosaron diferentes habilidades, talento, creatividade e coñecemento absoluto sobre a nosa Vila e a nosa Raíña do Miño, a Lamprea”

Os bosquexos foron avaliados por un xurado reunido o pasado día 11 de xaneiro ás 12.00 horas no Salón de Plenos do Concello de Arbo. Un xurado composto por membros representativos dos diferentes sectores empresariais e sociais da localidade. A elección resultou, aseguraron, "unha ardua tarefa, tendo en conta que os deseños, todos eles coa lamprea como tema principal, presentaban unha enorme destreza, dedicación e esmero". O cartel gañador é un deseño de Nestor Domínguez Lorenzo da Cañiza. "Un debuxo de gran orixinalidade formado por unha gran lamprea de cor verdoso no centro, acompañado dun fondo en tons degradados de edificacións clásicas e representativas de Arbo" sinalou o xurado. O gañador deste concurso obtivo un premio de 600 €, mentres que o segundo e terceiro clasificado obtiveron 300 € e 100 € respectivamente.